Материал ««Эсас макъсадымыз – халкъымызнынъ кучьлерини бирлештирмектир» («Наша основная цель – объединить общие усилия») посвящен созданию новой интернет-платформы, посвященной языку и культуре крымских татар.
Кечкен йылнынъ ноябрь айында чыкъкъан санларымызнынъ биринде окъуйыджыларымызны янъы «Лугъатчыкъ» илявесинен таныш эткен эдик. Оны ишлеп чыкъкъан программаджы Айдер Адживапов якъында даа бир меракълы лейханы амельге кечирди – о «Дияр» адлы интернет-платформаны мейдангъа кетирди.
Тилимиз, тарихымыз ве медениетимизни огренмек ичюн янъы бир имкянлар яраткъан мезкюр платформа Википедия киби чалышаджакъ. Семетдешлеримиз истеген вакъытларында халкъымызнен багълы чешит малюматны шу платформадан тапып оладжакълар, чюнки программаджылар бу платформагъа халкъымызнен багълы олгъан ве чешит саалар боюнджа малюмат кирсетмек истейлер.
Айдернинъ айткъанына коре, миллетмизни бельгилеген эсас джеэтлернинъ (тарих, медениет ве тилимиз) тикленильмеси ве инкишаф эттирильмеси ичюн халкъымыз бирлик косьтермей, бераберликте гъайрет этильмей. Бугунь бу сааларда файда кетирип оладжакъ адамларымыз чокълар, амма базыларынынъ лейхалары энди чалышмай, я да пек тар бир ёнелиштелер. Айдер семетдешлеримиз озь кучьлерини бирлештирселер, чокъча файда кетиреджеклеринде эмин. Шунынъ ичюн платформаны мейдангъа кетиререк, эсас макъсад сыфатында адамларымызны бирлештирмекни козьде туткъаныны сёйлей.
– Бирлешсек ве берабер гъайрет этсек, бир чокъ меселелерни чезмеге имкянымыз олур. Бу платформа да айны макъсаднен мейдангъа кетирильди. Онынъ эсасында къырымтатар тилини огренюв боюнджа универсаль курсларны, онлайн окъув системини, къырымтатарларнынъ тарихы боюнджа къулланмаларны, медениетимиз акъкъында макъалелерни, топонимикамыз акъкъында къылавузны (справочник), онлайн-кутюпхане ве бир сыра башкъа меракълы шейлерни япмагъа ниетленемиз. Биз умумий ишимизге озь иссесини къошмагъа истегенлерге де ярдым этмек истеймиз. Къыскъасы, огюмизде къойгъан эсас макъсадымыз – халкъымызнынъ кучьлерини бирлештирмектир, – дей Айдер…
Весиле МЕНУСМАН
Девамы: «Янъы дюнья» 12 (1602) 2.04.2021