Материал «ХАЛКЪ ЙЫРЛАРЫ КЪЫРЫМТАТАР АДАМЫНЫНЪ ГОНЪЛЮНИ АКС ЭТТИРЕ» («Народные песни отражают душу крымских татар») посвящен творчеству молодой и талантливой крымскотатарской певицы Лиля-Фруз Булгаковой.
Весиле МЕНУСМАН
Якъында Instagram ичтимаий агъында яш йырджы, семетдешимиз Лиля-Фруз Булгакова «Къадифеден кисеси» халкъ йырымызны иджра эткен видеосы пейда олды. Халкъ йырына янъы бир ренклер къаткъан къызны динълегенде о, музыканен профессиональ шекильде мешгъуль олгъаны ве халкъ йырларыны буюк севги ве усталыкънен иджра эткени анълашыла. Бу истидатлы яш йырджынен газетамызнынъ окъуйджыларыны да таныш этмек истеймиз.
Опера иджраджылыгъынен мешгъуль олгъан Лиля-Фруз Булгакова шимди Алманиянынъ Вюрцбург шеэринде яшап, музыка алий мектебинде магистратурада окъуй. Тувгъан шеэри – Кезлевни хатырлагъанда юрегинде бир сыджакълыкъ пейда олгъаныны айта. «Кезлевнинъ аджайип табиаты: денъизи, авасы, къадимий девир муити, онынъ мимарий абиделери даима юрегимде олып, мени ильхамландыра», — дей йырджы.
Газетамызда истидатлы яшларымызнен таныш олгъанынъызда, оларнынъ чокъусы ильхам ве кучьни Ватанымызнынъ дюльберлигинде тапкъанларыны корьгендирсинъиз. Керчектен де, Къырымда чешит девирлерде нидже истидатлы адам догъып осьти, нидже адамлар чешит санат эсерлеринен тек къырымлыларны дегиль де, дигер улькелернинъ сакинлерини де айретте къалдырды. Чюнки эр бир иджаткяр озь санатында корьген мухтешем Къырым табиатыны акс эттирмеге тырыша. Ресим, йыр, оюн, килим ве кирамет савуты олсун — эр ерде Ватанымызнынъ дюльберлиги акс олуна.
Лиля-Фруз чокъусы балачыкълар киби, балалыгъында йырламагъа севген. Амма къызчыкъ кучьлю сес саиби олгъаныны анълагъан ана-бабасы Лиля-Фрузны Кезлев санат мектебине окъумагъа бергенлер. Анда къыз фортепиано алетини ве академик вокалыны менимсеген.
Лиля-Фрузнынъ аилесинде къардашы Сафие де фортепиано чала, бабасы исе фортепианодан гъайры кемане ве труба алетлерини де чала экен…
ДЕВАМЫНЫ «ЯНЪЫ ДЮНЬЯ»ДА ОКЪУНЪЫЗ
«Янъы дюнья» №11(1601) 26.03.2021