Материал знакомит читателей с молодым крымским спортсменом, победителем множества чемпионатов по армрестлингу Аметханом Абдурамановым.
Бу куньлерде Орёл шеэринде сакъат спортчылар арасында армрестлинг (билек куреши) боюнджа Русие чемпионаты отькерильди. Чемпионатта 24 региондан 200 спортчы иштирак этти. Къырымтатар спортчысы Аметхан Абдураманов кене де эр кесни енъип, 85 кг чеки категориясында озь титулыны къорчалады ве алтын медальнен мукяфатланды.
Чемпионат гъалиплери Русие джыйма командасы теркибинде Авропа чемпионатына къатыладжакълар. Чемпионат Алитус (Литва) шеэринде майыс 14-23 куньлери кечириледжек. Армрестлинг боюнджа дюнья чемпионаты исе сентябрь айында Батуми (Гурджистан) шеэринде отькериледжек. Аметхан Абдурамановгъа оладжакъ нуфузлы чемпионатларда енъишлер тилеймиз.
Аметхан Абдураманов 1985 сенеси Озьбекистанда догъды. Дёрт яшында сакъат олды (ток ургъаны себебинден сол къолсыз къалды). 2013 сенеси Къырымгъа кочип, Акъмесджит шеэрининъ дживарында ерлешти. Бир чокъ халкъара ярышларнынъ гъалиби, отуз медальнинъ саиби, армрестлинг боюнджа Асия чемпионы, халкъара дереджели спорт устасы.
«Янъы дюнья», 7(1597) 26.02.2021