Материал «Бу – мисильсиз тамлылыкъ талап эткен бир унердир» («Это ремесло требует исключительную точность») знакомит читателей с творчеством молодого крымского ювелира Талята Абдуллаева.
Весиле МЕНУСМАН
Къуюмджылыкъ – декоратив-амелий санатнынъ энъ эски чешитлеринден бири сайыла. Чюнки адамлар та къадимий заманларда артыкъ озьлерини ильванларнен яраштырмагъа севгенлер. Бильхасса, къадынлар зийнетлерге очь олып, бу шейлерге буюк авес ве зевкънен бакъалар, аладжакъта айрыджа дикъкъат ве сабырнен сечелер.
2008 сенеси Калифорнияда кечирильген тедкъикъатларгъа коре, алимлер шопинг къадынларгъа буюк раатлыкъ багъышлагъаныны къайд эттилер. Ве айны тедкъикъат черчивесинде олар даа бир шейни бильдилер ки, къадынларнынъ кейфине энъ яхшы, энъ мусбет тесир эткен шей – муджевхерат, яни къуюмджылыкъ эшьялары сакинлештире экен, оларгъа озьлерини даа да эмин дуймагъа ярдым эте экен.
Январь 31-де бу нефис ве муреккеп бир унернинъ саиплери Халкъара къуюмджылыкъ кунюни къайд этелер. Къадимий Юнанистанда пейда олгъан бу санат чешитинен бугунь Къырымда да бир чокъ семетдешлеримиз мешгъуль. Иште, сизни шойле адамлардан бири – истидатлы къуюмджы Талят Абдуллаевнен таныш этмек истеймиз.
Къуюмджы эм къадын-къызлар, эм эрлер ичюн гузельден-гузель ильванлар – чифтлер ичюн алтын ве кумюш нишан юзюклери, къызчыкълар, къадын-къызлар ичюн зариф купелер, къадын эллерине дюльберлик къаткъан билезликлер япа.
Талят Абдуллаев Самаркъанд шеэринде догъды. 1990 сенеси къорантасынен Къырымгъа кочип кельди. Къуюмджы балалыгъындан тасвирий санатнен меракълангъан, ресим япмагъа пек севген ве мектептен сонъ атта Самокиш адына тасвирий санат окъув юртуна кирмеге ниетленген, амма сонъра аятыны ресимнен багъламакътан вазгечкен.
Ордуда хызмет эткен сонъ йигит Акъмесжит шеэриндеки къуюмджылыкъ окъув юртында тасиль алгъан ве белли къуюмджы Мехти Исламов тэсис эткен «Дюльбер» къуюмджылыкъ эвине давет этильген. Талят Абдуллаев он беш йыл къуюмджылыкъ эвинде чалышып, бу унерде озь теджрибеси ве усталыгъыны арттыргъан…
ДЕВАМЫНЫ «ЯНЪЫ ДЮНЬЯ»ДА ОКЪУНЪЫЗ
«Янъы дюнья», №3(1593), 29.01.2021