В статье предоставляется интервью с тренером Энвером Сейдаметовым и идёт речь о футбольном клубе «Кызылташ».
Весиле МЕНУСМАН субетлешти
Къырымда футбол насыл инкишаф эте? Ярымадамызда футбол такъымларына ким ракъипликни япа? Биз бу акъта «Къызылташ» футбол такъымынынъ спорт мудири ве тренери Энвер Сейдаметовнен субетлештик.
Багъчасарайлы Энвер Сейдаметов бир чокъ йыл девамында чешит футбол такъымларында ойнап, сонъра тренерлик карьерасыны башлагъан. Келинъиз, футболджынынъ фаалиетинен якъынджа таныш олайыкъ.
– Энвер бей, къач яшындан футбол ойнап башладынъыз?
– Он алты яшындан футбол ойнайым. Бундан эвель алты яшындан бокснен мешгъуль эдим. Бокс боюнджа спорт усталыгъына намзет сайылам. Амма он алты яшында элимни къыргъаным ичюн бу спорт чешитини ташламагъа меджбур къалдым. Мен о вакъыт спорт оюнларынен пек меракълана эдим. Амма маддий меселелер ве о йыллары спорт тёгереклери чокъ дегиль эди. Ниает, ана-бабам мени Багъчасарай шеэриндеки «Спартак» клубына бердилер. О ерде мен футболнен таныш олып, бу спорт чешитинде озь усталыгъымны арттырдым.
– Энди не вакъыт футболнен джиддий оларакъ мешгъуль олдынъыз? Насыл такъымларда ойнадынъыз?
– Он докъуз яшымда ордуда хызмет этип къайткъан сонъ, озюмни «Севастополь» ве «Таврия» футбол клубларынынъ дубль такъымларында сынап бакътым. Сонъра мени «Черноморнефтегаз» футбол клубына давет эттилер. Бу клубда ойнагъан сонъ, Мелитополь шеэриндеки «Алком» футбол клубында ойнадым. Бираз вакъыт анда ойнап, «Княжа» (Киев виляетининъ Борисполь районы) такъымына авуштым. Эписи бу такъымларнен мен къыскъа муддет чалышып, сонъ Ватанымызгъа къайттым. Къырымда авескяр севиесинде ярыпрофессионал «Форос» (Ялта) такъымында дёрт йылгъа якъын ойнап, Кезлев шеэринде ерлешкен «Агрокапитал» авескяр такъымында ойнадым.
– Футбол оюнджысындан насыл этип тренерликке кечтинъиз?
– Энди йигирмим еди яшында олгъанда буюк футбол командаларына кирип оладжагъыма умютни тамамиле джойдым. О вакъытлары бу саада чалышкъан таныш-билишлерим ёкъ эди. Бойлеликнен, мен футболджы дегиль де, тренер олмакъ къарарына кельдим. Багъчасарай районынынъ Хан эли (Новопавловка) къасабасында ерлешкен «Скиф» футбол клубында балачыкъларны ойнамагъа огретип башладым…
ДЕВАМЫНЫ «ЯНЪЫ ДЮНЬЯ»ДА ОКЪУНЪЫЗ
«Янъы дюнья» №49(1587) 11.12.2020