На днях в издательстве «Амирит» вышел в свет сборник стихов молодого писателя, члена Евразийской творческой гильдии, главного редактора газеты «Янъы дюнья» Сейрана Сулеймана «Бугунь сени кене хатырладым…» («Сегодня вновь я вспомнил о тебе»), в который вошли стихотворения автора, написанные им в разные годы. В своём сборнике поэт отобразил и раскрыл читателям свою душу, свои эмоции, чувства. Читая книгу, невольно задаешь себе вопрос: «Неужели автор все это пережил?». Книга Сейрана Сулеймана «Бугунь сени кене хатырладым…» не оставит равнодушным ни одного читателя.
Якъынларда «Амирит» нешриятында «Бугунь сени кене хатырладым…» китабы дюнья юзю корьди. Китапнынъ муэллифи, истидатлы яш шаиримиз, « Янъы дюнья» газетасынынъ баш муаррири – Сейран Сулейман. О, Къырымтатар Языджылары бирлиги ве Аврасия иджадий гильдиясынынъ азасы. Махмуд Къашгъарлы ве Григорий Сковорода адына эдебий мукяфатларнынъ лауреаты.
Мезкюр китапны окъугъанда алтын къафестеки бульбуль киби муджизевий севги иле толу лирик къырымтатар шиириетине даласынъ. Языджымызнынъ чешит мевзуларда яраткъан шиириетининъ шааты оласынъ. Китапнынъ муэллифинен берабер эм агълайсынъ, эм кулесинъ, раатсызланасынъ, севинесинъ, къайгъырасынъ, кедерленесинъ, яни там манада назмиет дюньясына даласынъ. Самимий къальпнинъ чын дуйгъуларынен ифаделенген севги ве тебессюм кимсени лякъайд къалдырмайджагъына эминим. Ильхам перисининъ тесири алтында язылгъан умют ве хаяллары, макъсадлары ачыкъ-айдын сезильмектелер. Шиирлердеки къафие, везин, ургъу, сербест сатырлар, тесирли сёзлер окъуйыджыны ильхам дюньясына джельп эте. Ватанына, анасына, миллий байрагъына, яресине, чевре-четтеки инсанларгъа, табиат манзарасына ве дигер аят аляметлерине аит олгъан шиирлернинъ мана ве сатырлары анълайышлы ве пек меракълыдыр. Эр бир сёз, сатыр ве ибаре джанлы гъайрет ве темиз дуйгъулы севгисинен синъдирильген.
Китаптаки шиирлер чешит йылларда язылгъан. Оларны окъугъан сайын меракълы суаллер догъа: «Сатырларгъа тёкюльген фикирлер шаирнинъ омюрине аитми? Я да тек омюрюни иджатнен багълагъан истидатлы инсаннынъ ой-фикилери, истисна оларакъ, бизимкилерден фаркъ этеми?!». Акъылгъа кельген нидже суаллер окъуйыджыны тынч къалдырмай, окъугъан сайын джевапсыз суаллернен толу тюшюнджели алемге ёллай. Назмиетке севда олгъан окъуйыджылырымызгъа бу аджайип китапны теклиф этемиз. Иншалла, ильхам дюньясына далып, китапта олгъан ширлерден теселли алырсынъыз!
Назифе Абибулаева азырлады