А. АЛИ
Август 20-де къадимий Кезлев шеэринде «Гезлев къапысы» фестивали черчивесинде аньаневий «Ашыкъ окъувлары» отькерильди. Бу йыл 17-нджи кере кечкен окъувлар шеэр шурасы, шеэр мемуриети, ерли медениет ве миллетлерара мунасебетлер идареси тарафындан тешкиль этильди. Фестиваль ве окъувларнынъ кечирильмесине Госкомнац ве «Халкълар достлугъы эви» къолтутты.
Кезлев шеэр шурасынынъ депутаты Эльдар Ибрагимов, медениет ве миллетлерара мунасебетлер идаресининъ башы Эльмира Акимова, И. Сельвинский адына эдебий бирлешменинъ азасы, бир сыра конкурсларнынъ лауреаты Мидат Аблялимов Ашыкъ окъувларынынъ иштиракчилерини селямлагъан сонъ, Кезвлевде Пушкин адына кутюпханенинъ библиографы Янина Грошева «Ашыкъ шиириети» сергисини такъдим этти.
Белли языджы, КъМПУ теркибиндеки Ильмий-тедкъикъат институты лабораториясынынъ мудири олгъан Аблязиз Велиев озь шиирлерини окъуп, бугуньде «Ашыкъ Умер» адлы музыкалы драма язаяткъаныны айтты ве бу эсер миллий театримизде санагъа къоюладжагъына умют бильдирди. Мезкюр лабораториянынъ хадими, журналист Сервер Бекиров, «Йылдыз» меджмуасынынъ баш муаррири Дилявер Осман, «Янъы дюнья» газетасынынъ баш муаррири Сейран Сулейман озь чыкъышларында Ашыкъ Умернинъ иджадыны популярлаштырувгъа буюк иссе къошкъан Исмаил Гаспринский ве Феликс Домбровский (19-нджы асыр) эм де Эшреф Шемьи-заде ве Риза Фазыл (20-нди асыр) киби эрбапларны анъып кечтилер. Олар Ашыкъ Умер Тюркиеде де белли олса да, онынъ Тюркиеде дегиль, Къырымнынъ Кезлевинде дюньягъа кельгени шубе догъурмагъаныны къайд эттилер.
Лякин Ашыкъ Умернинъ догъгъан сенесине кельгенде тюрлю тахминлер ортагъа чыкъа. Ашыкъ окъувларынынъ тешкилятчылары 1621 сенесине эсасланаракъ, огюмиздеки 2021 сенеси Ашыкъ Умернинъ 400 йыллыгъы оладжагъыны ве юбилей тантаналы шекильде къайд этиледжегини бильдирдилер.
Тедбирде шаире Ленифер Мамбетова, бедиий сёз устасы Риза Юсуф, Ашыкъ Ресуль озь шиирлерини окъуп, янъы чыкъкъан китапларыны ерли кутюпханеге эдие эттилер. Къырымтатар медений-тарихий музейининъ ильмий хадими Мустафа Мустафаев Аметхан Султаннынъ 100 йыллыгъы мунасебетинен онынъ акъкъында весикъалф фильмни такъдим этти. «Халкълар достлугъы эви»нинъ болюк мудири Гульчер Зекерьяева Къырымда тешкиль этильген ве этиледжек фестиваллер, янъы лейхалар акъкъында икяе этти…