Сайде СЕИТДЖЕЛИЛ субетлешти
Халкъымыз арасында иджаткяр адамлар чокъ. Санатнен огърашып, медениетимизнинъ инкишафына иссе къошкъан ватандашларымыз дикъкъатымызны айрыджа джельп этелер. Олардан бири истидатлы, яш, лякин озь ишине пек джиддий янашкъан хаттат, оджа Мамут Суфьяновдыр. О, Къырымда бир вакъытлары фааль инкишаф эткен, сонъра 120 йылгъа гъайып олгъан санатны янъыдан джанландырмакъ истей. Биз онынънен якъын вакъытта ачыладжакъ Ислямий санатлар мектеби ве хаттатлыкъ санаты акъкъында субетлештик.
– Мамут бей, буюк лейха узеринде чалышкъанынъызны билемиз. Ниет эткенинъиз Ислямий санатлар мектеби не вакъыт ачыладжакъ?
– Шимдики заманда Къырымда Шаркъий санатларны огренмек меселеси пек актуальдир, чюнки XIX асырнынъ сонъунда аньаневий ислямий санатлар гъайып олгъан эди. О вакъыттан берли 120 йыл кечти ве бу энди хаттатлыкъны янъыдан джанландырмакъ керектир. Къырымымызда сувлу боянен ресимлер эвеллери чокъ япыла эди. Мен истанбуллы ве авропалы мешур хаттатларнен субетлешип, Къырымда хаттатлыкъны джанландырмакъ ве инкишаф эттирмек кереклигини анълаттым ве олар бу ишнен меракъландылар. Бизим кунюмизде бойле мектеп ачмакъ янъы бир шейдир. Шимди Къырымда шаркъий санатлар мевзусында екяне мутехассыс меним. КъМПУ ректоры Чингиз Якъубов Ислямий санатлар мектебини ачмакъ фикримнен меракъланып, университет теркибинде Ислямий санатлар мектебининъ ачылмасына къолтутмагъа азыр олгъаны ичюн онъа миннетдарлыгъымны бильдирем. Къысмет олса, Ислямий санатлар мектебимиз бу сене кузьде КъМПУде ачыладжакъ.
– Мектепнинъ мейдангъа кетирильмесинден эсас макъсад недир?
– Макъсадым, озь миллетимизге ве Къырымда яшагъан бутюн халкъларгъа XVI асырдан башлап къырымтатарларда Ислям санатларынынъ къадимий аньаневий мектеби чалышкъаныны косьтермектир. Бойле мектепте тезхиб ве хуснихатнынъ чешит усулларыны, уруфатны (шрифт), кягъыт ве мерекепни япмагъа эвель-эзельден огрене эдилер. Бундан гъайры эсас ниетим яшларны джельп этмектир, оларгъа тасиль бермек, сагълыкъ джеэтинден имкянлары сынъырлы олгъан балаларгъа ярдым этмектир, оларгъа гузель санатны огретмек. Миллетимизнинъ медениети эм рессамлыкъ санатынынъ инкишафына озь иссемни къошмакъ, хаттатлыкъ аньанелерини девам этмек истегим бар.
– Окъув не къадар девам этеджек?
– Мен оджа олып шегиртлерни бир къач ай ичинде огрете билем, лякин санатны темелинден огренип дипломны алмакъ ичюн окъув 3 йыл девам этеджек. Хаттатлыкъ къадимий санаттыр. Эсерлеримни мен эм индже фырчыларнен, эм де махсус къалемлер иле мерекепнен язам. Мен учь йыл девамында санатнынъ тарихыны, назариесини ве фельсефесини темелинден огрендим. Хасам оджам манъа даима ярдым этти, сагъ олсун…
ДЕВАМЫНЫ “ЯНЪЫ ДЮНЬЯ”ДА ОКЪУНЪЫЗ